季芸

幾年前一時興興學韓語，雖然學無偌久，嘛捌無偌濟，毋過無意中煞發現韓語佮臺語竟然有真濟仝款的所在。

疫情霆雷公，風雨滿天，出門驚驚，閒閒佇厝閣毋知欲創啥？想講啊無規氣來共已經咧欲袂記得了了的韓語閣來重學一擺，順紲練一下啊臺語文，按呢嘛算是一兼二顧，摸蜊仔兼洗褲。

講著韓語，佮真濟語言仝款，韓語嘛有母音佮子音，母音10个，子音14个，這佮中文攏總有37个注音比起來，韓語的字母算無濟。另外，佮中文無仝款的，韓語是表音的文字，只要會曉基本的發音，看著字基本上大部份攏會當唸出來，這點佮中文會使講差真濟。

除了發音，文字嘛是語言的一部份，聽講當初時發明韓文的世宗大王咧創造文字的時陣，拄好面對窗仔門，所以韓文的每一个母音看起來就敢若是窗仔門框的某一个角度，而且因為是一對一對，所以講起來其實嘛算真好記啦。

廢話減講，今仔日就對發音開始來學，頭一个音「ㅏ」是基本的母音，看起來是毋是親像窗仔門框的倒爿？「ㅏ」的發音嘛真簡單，就佮咱注音的「ㄚ」差不多，只是韓語無聲調的分別，所以發音有時會因為講話時的口氣佮情緒有淡薄仔無仝。

韓語因為母音袂當做頭前，所以文字內底若是母音頭前無子音通常會補一个子音「ㅇ」，然後「ㅏ」就會變成「아」。敢有發現，字母的「ㅏ」佮文字的「아」的音攏仝款？無毋對，彼是因為囥佇頭一字的「ㅇ」通常是毋免發音的。

「아」這个字佇韓語會使講真捷看著，譬如講아줌마(大嬸)、아저씨(大叔)，有咧看韓劇的人應該攏捌聽過。另外，「아」嘛定定用佇咧人名內底，韓國天團少女時代的「潤娥」，伊的韓文名就是叫做「윤아」，連音的關係，아佮頭前的尾音ㄴ(ㄋ)連起來，所以唸做 윤아，毋是윤아 喔。