粽芳 / 季芸
大鼎煠一捾年節的芳氣
衝煙的記持
綴水煙勻勻仔湠開
粽箬仔先洗予清氣
攢好囥一邊
紅蔥頭切片
寬寬仔炒出芳氣
香菇毋免傷大蕊
規蕊下落去
好看閣好入喙
三層半精半肥上蓋媠
五香粉是祕密武器
這味若無摻落去
肉粽就會欠一味
阿母真噤喙
聽講鴨卵仁較毒氣
伊就煠雞卵來相添
炒料的湯汁毋通浪費
提來炒米按呢粽才會有滋味
阿母無食塗豆
米豆仔粽有特別的氣味
鹼粽是較細粒子
豆油膏無合味
糖若搵落去
喙舌就會笑微微
風，微微
翕熱的空氣
鼻袂著熟似的芳味
敨開的思念，恬恬
綴風飛入雲裡
請先 登入 以發表留言。