「ㅓ」(ㄛ)是韓語的第三个母音，看起來是毋是有淡薄仔面熟？敢若佮頭一个母音「ㅏ」(ㄚ)欲仝啊欲仝對無？是啦，進前講韓語的母音就敢若是窗仔門框的某一个角度，「ㅏ」(ㄚ)是倒爿，啊「ㅓ」(ㄛ)拄好是正爿，兩个母音看起來差不多，只是方向不仝爾爾。
發音的部份，「ㅓ」的發音接近華語的(喔)，佮臺語烏色的(烏)差不多。聽著「ㅓ」(ㄛ)，無定有人會去想著，這个「ㅓ」(ㄛ)敢會就是轟動武林驚動萬教，迷倒一thoo33 la55 khuh3查某囡仔，就連囡仔嘛攏知影的「歐巴」彼个「歐」？哈！真歹勢，(此ㅓ 非彼歐)，「歐巴」的「歐」是另外一个「ㅗ」，毋是這个「ㅓ」啦。
毋是「歐巴」的「歐」，啊無是佗一字「ㅓ」(ㄛ)？將將…是阿母「어머니」的「어」啦。
有咧看韓劇的人，應該捌聽過韓國人咧受氣猶是咧喝咻的時陣，攏會講야~야~야~，意思就是咱咧講的喂~喂~喂~啦。
「ㅑ」(ㄧㄚ)是韓語的第二个母音，佮頭一个母音「ㅏ」(ㄚ)會使講是雙雙對對萬年富貴，啊~毋是啦，我是講「ㅏ」佮「ㅑ」看起來差不多，精差講「ㅑ」比「ㅏ」有加一劃啦。另外發音的部份，「ㅏ」的音佮咱臺語的「鴨」差不多，啊「ㅑ」的發音是「ㄧㄚ」，拄好佮華語的「鴨」嘛差不多，按呢講是毋是真趣味嘛真好記咧。
頂回講韓語的母音袂當做頭前，所以文字的時陣，仝款頭前愛補一个圓箍仔，也就是子音「ㅇ」。人講囡仔人有耳無喙，佇母音頭前的子音「ㅇ」袂當出聲，所以「ㅇ」+「ㅑ」了後，嘛是仝款唸做「야」。
幾年前一時興興學韓語，雖然學無偌久，嘛捌無偌濟，毋過無意中煞發現韓語佮臺語竟然有真濟仝款的所在。
疫情霆雷公，風雨滿天，出門驚驚，閒閒佇厝閣毋知欲創啥？想講啊無規氣來共已經咧欲袂記得了了的韓語閣來重學一擺，順紲練一下啊臺語文，按呢嘛算是一兼二顧，摸蜊仔兼洗褲。
講著韓語，佮真濟語言仝款，韓語嘛有母音佮子音，母音10个，子音14个，這佮中文攏總有37个注音比起來，韓語的字母算無濟。另外，佮中文無仝款的，韓語是表音的文字，只要會曉基本的發音，看著字基本上大部份攏會當唸出來，這點佮中文會使講差真濟。
除了發音，文字嘛是語言的一部份，聽講當初時發明韓文的世宗大王咧創造文字的時陣，拄好面對窗仔門，所以韓文的每一个母音看起來就敢若是窗仔門框的某一个角度，而且因為是一對一對，所以講起來其實嘛算真好記啦。
自認狗聲乞食喉，所以自細漢我就毋敢唱歌，除非是音樂課，無唱袂煞得，若無欲叫我佇眾人面頭前開喙唱歌，可能愛等天落紅雨日頭對西爿出來。
講著音樂課，國校仔的時陣，逐擺若是搪著欲考唱歌我就掣咧等，足驚五音不全去予同學笑甲反過。彼咧時陣，考唱歌愛徛佇老師的邊仔，老師那彈琴，輪著考試的同學就綴咧那唱。因為緊張，考唱歌的時陣我攏毋敢唱傷大聲，目睭嘛毋敢看下面的同學，一个心肝頭咇噗彩，手心流凊汗，一條歌唱煞已經軟跤。
高中的時陣，社團活動定定愛唱歌，佳哉是一陣人做伙唱，所以我就較毋驚，細細聲仔放輕鬆綴逐家做伙唱，橫直唱無好嘛無人知影。
出社會了後，三不五時朋友相招去KTV，大部份我攏是坐佇遐負責拍噗仔，恬恬仔欣賞朋友的歌聲，mai51 ku11是連摸攏毋敢去摸。有當時仔朋友看我攏無唱會鼓勵我唱一條，面皮薄驚歹勢的我，猶原選擇做一个忠實的聽眾較妥當。
毋知對當時開始，毋敢唱歌的我雄雄煞變甲真愛唱歌，甚至家己寫歌。其實會當唱家己寫的歌嘛是一種誠幸福的代誌。袂曉樂器嘛毋捌樂理的我，一開始只是改編一寡現有的歌，後來因為愛寫，愈寫愈濟，干焦有詞無曲無法度唱，落尾我才沓沓仔試看覓共家己寫的詞唱出曲調。雖然講毋是專業，毋過捷寫捷唱，久矣嘛變做一種特別的趣味。
知影這个所在，是佇咧差不多六、七冬前。彼咧時陣我定定𤆬(tshuā )查某囝佇市內四界行，有一工經過忠義路佮中正路口時，看著幾若个人徛佇土地銀行的頭前用手機仔不知咧翕啥物？詳細共看，敢若是咧翕斜對面路角彼間看起來舊舊的樓仔厝。
「彼是『林百貨』啦……。」經過查某囝的解說我才知影，原來這間五樓懸，看起來有一寡歷史的店是臺灣第二間，南臺灣第一間的百貨公司，嘛是府城的古蹟之一。講起來真見笑，身為臺南人，我竟然毋知影有這个所在，若毋是查某囝捌佇電視看過，我可能猶捎無是按怎遐的人欲翕這棟厝。
頭一擺經過，我無入去，後來有一工，我雄雄毋知佗一條筋去想著，想講閒閒啊無罔來去共lau看覓咧。會記得彼工差不多天欲暗仔的時陣，我對民權路斡過忠義路，遠遠就看著金光閃閃袂輸敢若皇宮仝款的林百貨。「哇！」暮色探頭，已經點燈的林百貨，佇那來那暗的街頭特別顯頭。人講人未到聲先到，我是人猶未到林百貨，就袂輸去予電電著，目睭前奢颺的景緻，媠甲予我煞毋知欲講啥貨？
來到林百貨，一入門，滿滿的古早味，尤其是彼台古早落地型的電視，予我想著較早阮兜嘛有一台這款的電視。電梯有淡薄仔細台，干焦開放一樓到五樓，若是身體不方便的，共服務人員講一下，伊就會幫你開鎖，按呢就會當去其他的樓層矣。另外佮一般電梯無仝款的是，遮的電梯地板毋是大理石，是「馬賽克」的thài-lù，頂頭閣有「1932」的字樣，原來這台電梯是1932年就有矣，算起來嘛已經欲規百冬矣。
雖然只有五樓懸，內底所在嘛無算真闊，不而過誠有特色，有真濟懷舊的物件猶閣有伴手禮，四樓是冊店佮咖啡廳，樓尾頂閣有一个神社，若是有閒三不五時來遮行行踅踅咧嘛是袂䆀(bái)啦。
三月矣，天氣那來那熱，想講電風的「遙控器」無電矣，拄好進前買的電池猶有賰，規氣先換換咧另工若欲吹較方便。
電池換好先試看覓。「欸！哪會攏無反應啊？」揤規晡，電風仝款攏無振動。
「哪會按呢？敢會我電池鬥毋著？」
「哪有可能？連電池嘛會鬥毋著？」查某囝毋相信換電池遮爾簡單的代誌我會舞重耽。
「啊無…敢會是『遙控器』歹去矣？」一時捎無的我，只好按呢臆。
