信篤，是目前猶閣時常聽著的臺語詞，意思是相信，或者是華語講的「理會」。譬喻講：「無彩我講規晡，你煞攏無咧共我信篤。」。
講著信篤，就想著較早阮阿母閣佇咧的時陣，毋知是看電視？抑是捌聽阮遮序細咧講？讀日本冊根本毋捌華語的阿母，竟然嘛受著影響，天才的阿母共「信篤」變做臺灣國語的「ㄓㄨ道」，然後阮就定定聽阿母咧唸：「啊講(管)就一枝長長啦，嘛毋知有咧共我ㄓㄨ道啊無咧共我ㄓㄨ道？」哈…落尾連我這个查某囝，嘛開始會學阿母的口氣，共我的查某囝唸：「啊我咧講啥，你是有咧共我ㄓㄨ道啊無啊？」。
信篤，這句算較簡單，按呢講，應該逐家攏「知道」啦謼(hooh)。
自細漢講臺語講甲大漢，對我來講，臺語輾轉是理所當然的代誌。毋過自從開始寫臺語文了後，我沓沓仔發現，因為長期性受華語佮環境改變的影響，其實我的臺語已經淡薄仔走精矣，真濟傳統臺語的話語，雖然猶閣聽有，毋過因為平常時仔無咧講，所以嘛漸漸咧欲袂記得了了矣。
撨摵，這句較早佇庄跤定定聽著的話，這馬真罕得聽人講，意思是安排、調度。譬喻講：「中秋節猶未到，阿爸就已經咧撨摵欲烘肉的代誌矣。」閣譬喻講：「啊你若遐邇gâu，啊無攏交予你去撨摵好矣。」閣再譬喻講，較早大人定定咧罵囡仔：「册毋讀，規工干焦知影撨摵欲去佗𨑨（tshit）迌。」。
撨摵，按呢講，毋知逐家敢聽(看)有？
青春五四三(一) / 季芸
頭一擺食西餐是佇咧高一的時陣。會記得彼當陣新生一開學，因為導仔(班導)請產假，導仔是教官，所以來代理的是臺南女中的一位葉教官。葉教官嘛是女教官，雖然生做有淡薄仔細粒子，毋過個性誠豪爽，講話嘛真心適，到今我猶閣會記得開學彼工葉教官的自我介紹，葉教官講in兜蹛佇「葉厝村」，「葉」來「葉」厝的「葉厝村」，葉教官刁意故的臺灣國語腔口，予我真深的印象。
雖然是代理導仔，上的又閣是軍訓這種嚴肅又閣無聊的課程，不而過因為個性真好鬥陣上課閣趣味，佮同學之間會使講袂輸朋友仝款，所以班上的同學攏真佮意葉教官。
無偌久，原來的導仔也就是朱教官產假結束轉來矣，這个時陣當然葉教官嘛愛轉去臺南女中矣，同學逐家雖然攏真毋甘，毋過這嘛是無法度的代誌。其實朱教官人嘛真好，只是因為逐家已經慣勢葉教官矣，短短時間閣愛重適應需要一點仔時間。
自認狗聲乞食喉，所以自細漢我就毋敢唱歌，除非是音樂課，無唱袂煞得，若無欲叫我佇眾人面頭前開喙唱歌，可能愛等天落紅雨日頭對西爿出來。
講著音樂課，國校仔的時陣，逐擺若是搪著欲考唱歌我就掣咧等，足驚五音不全去予同學笑甲反過。彼咧時陣，考唱歌愛徛佇老師的邊仔，老師那彈琴，輪著考試的同學就綴咧那唱。因為緊張，考唱歌的時陣我攏毋敢唱傷大聲，目睭嘛毋敢看下面的同學，一个心肝頭咇噗彩，手心流凊汗，一條歌唱煞已經軟跤。
高中的時陣，社團活動定定愛唱歌，佳哉是一陣人做伙唱，所以我就較毋驚，細細聲仔放輕鬆綴逐家做伙唱，橫直唱無好嘛無人知影。
出社會了後，三不五時朋友相招去KTV，大部份我攏是坐佇遐負責拍噗仔，恬恬仔欣賞朋友的歌聲，mai51 ku11是連摸攏毋敢去摸。有當時仔朋友看我攏無唱會鼓勵我唱一條，面皮薄驚歹勢的我，猶原選擇做一个忠實的聽眾較妥當。
毋知對當時開始，毋敢唱歌的我雄雄煞變甲真愛唱歌，甚至家己寫歌。其實會當唱家己寫的歌嘛是一種誠幸福的代誌。袂曉樂器嘛毋捌樂理的我，一開始只是改編一寡現有的歌，後來因為愛寫，愈寫愈濟，干焦有詞無曲無法度唱，落尾我才沓沓仔試看覓共家己寫的詞唱出曲調。雖然講毋是專業，毋過捷寫捷唱，久矣嘛變做一種特別的趣味。
知影這个所在，是佇咧差不多六、七冬前。彼咧時陣我定定𤆬(tshuā )查某囝佇市內四界行，有一工經過忠義路佮中正路口時，看著幾若个人徛佇土地銀行的頭前用手機仔不知咧翕啥物？詳細共看，敢若是咧翕斜對面路角彼間看起來舊舊的樓仔厝。
「彼是『林百貨』啦……。」經過查某囝的解說我才知影，原來這間五樓懸，看起來有一寡歷史的店是臺灣第二間，南臺灣第一間的百貨公司，嘛是府城的古蹟之一。講起來真見笑，身為臺南人，我竟然毋知影有這个所在，若毋是查某囝捌佇電視看過，我可能猶捎無是按怎遐的人欲翕這棟厝。
頭一擺經過，我無入去，後來有一工，我雄雄毋知佗一條筋去想著，想講閒閒啊無罔來去共lau看覓咧。會記得彼工差不多天欲暗仔的時陣，我對民權路斡過忠義路，遠遠就看著金光閃閃袂輸敢若皇宮仝款的林百貨。「哇！」暮色探頭，已經點燈的林百貨，佇那來那暗的街頭特別顯頭。人講人未到聲先到，我是人猶未到林百貨，就袂輸去予電電著，目睭前奢颺的景緻，媠甲予我煞毋知欲講啥貨？
來到林百貨，一入門，滿滿的古早味，尤其是彼台古早落地型的電視，予我想著較早阮兜嘛有一台這款的電視。電梯有淡薄仔細台，干焦開放一樓到五樓，若是身體不方便的，共服務人員講一下，伊就會幫你開鎖，按呢就會當去其他的樓層矣。另外佮一般電梯無仝款的是，遮的電梯地板毋是大理石，是「馬賽克」的thài-lù，頂頭閣有「1932」的字樣，原來這台電梯是1932年就有矣，算起來嘛已經欲規百冬矣。
雖然只有五樓懸，內底所在嘛無算真闊，不而過誠有特色，有真濟懷舊的物件猶閣有伴手禮，四樓是冊店佮咖啡廳，樓尾頂閣有一个神社，若是有閒三不五時來遮行行踅踅咧嘛是袂䆀(bái)啦。
三月矣，天氣那來那熱，想講電風的「遙控器」無電矣，拄好進前買的電池猶有賰，規氣先換換咧另工若欲吹較方便。
電池換好先試看覓。「欸！哪會攏無反應啊？」揤規晡，電風仝款攏無振動。
「哪會按呢？敢會我電池鬥毋著？」
「哪有可能？連電池嘛會鬥毋著？」查某囝毋相信換電池遮爾簡單的代誌我會舞重耽。
「啊無…敢會是『遙控器』歹去矣？」一時捎無的我，只好按呢臆。
讀冊 / 季芸
我是冬尾囡仔，八歲才入學去讀冊。較早的囡仔無像這馬的囡仔遐好命有人載，讀冊攏嘛愛家己行路去。學校離厝有淡薄仔遠，囡仔人跤較短，行路愛行足久的，所以彼當陣我足欣羨住佇學校邊仔的同學，三兩步就會當到學校矣，攏毋免煩惱會遲到。
因為教室無夠，所以一、二年仔的時陣有分讀下早仔佮讀下晡時仔。若是輪著讀下早仔，欲去學校進前就愛先去廟埕排路隊，路隊排好才做伙行去學校；若是輪到讀下晡時仔，有當時仔就愛順紲幫三姊捾飯。三姊加我四屆，我讀一年仔的時陣，三姊拄升過五年的，三姊的老師足歹的，是學校有名的刺查某，彼咧時陣我就咧想，以後千萬毋通去予三姊in老師教著，啊若無皮就愛繃較絚咧。
講著捾飯，較早學校無「營養午餐」，袂記得學校是毋是有咧炊飯？干焦會記得中晝頓毋是厝內底的人捾飯來，就是愛家己轉去厝食，食飽才閣轉去學校讀冊。小弟減我兩屆，我升五年的時陣，小弟嘛已經讀三年仔矣，無人會當幫我捾飯，所以就愛家己轉去厝食飯。學校離厝實在無近，所以定定攏嘛用走的，因為轉去學校的時陣若是袂赴「午休」，去予「糾察隊」記著名，按呢代誌就大條矣，會予老師罰「半蹲」，印象中，有當時仔嘛會罰去「勞動服務」。
厝欲去學校有兩條路，一條是大路，路闊好行不二過較遠。大路有真濟店仔，會當那行那𨑨迌(tshit-thô)，彼時陣中晝時仔拄好有咧搬布袋戲，大部份的店仔攏有電視，有的人就那行那看布袋戲，有時看甲戇神袂記得時間，轉去學校袂赴「午休」這聲就知死矣。
祖厝 / 季芸
祖厝是塗墼厝，坐北向南，干焦正身，無護龍；東爿另外閣有一間枋仔厝，內底有總舖，佮一間灶跤，彼是落尾手才閣搭的。阿爸有三个兄弟仔，大漢阿叔足早就搬出去矣，賰細漢阿叔蹛做伙。阿公人真好，雖然房間無濟，看一个阿伯有困難，阿公就共枋仔厝佮一間五間仔借in一家伙仔住。落尾阿伯in搬走了後，原本規家伙仔kheh一間房間的阮，才搬過去枋仔厝彼爿。
客廳是頂下桌，除了尪架桌，猶閣有一塊八仙桌。尪架桌是服侍神明佮公媽，八仙桌除了拜拜，嘛是食飯桌仔，彼个時陣攏是坐佇椅條食飯的。壁頂頭有一个舊舊的相框，內底有幾張細細張仔的烏白相片，相片內底的人我毋捌看過，聽阿母講彼是阿祖。
伐過客廳的戶橂，兩爿邊仔是疊磚仔的巷路仔。佮一般的亭仔跤無相仝的是，巷路仔算半室內，雖然干焦差不多一个人會當行的闊度，毋過落雨澹滴的時陣毋免泅來泅去嘛算是誠利便。巷路仔的壁頂頭，有留幾个會當通風、差不多是一塊磚仔的闊度的磚仔縫，拄著落雨天袂當出去耍的時陣，囡仔人無議量，有當時仔，我就會徛佇巷路仔的磚仔縫頭前看外口的雨。我會記得，巷路仔壁頂頭閣有liù一領棕蓑，彼是落雨的時陣阿公咧穿的。印象中，阿公的性情誠好，罕得聽伊咧起性地抑是大細聲，毋過我有淡薄仔驚伊，阿公重男輕女，我總是感覺，阿公敢若較疼叔伯小弟in。
阿公佇庄仔內誠受人敬重，彼个時陣厝後大路的榕仔邊有一間戲園，囡仔人橐袋仔袋磅子，哪有可能會當入去看戲？不而過若是綴佇阿公的後壁走，按呢毋免買票就會當入去矣。我捌綴阿公入去一擺，毋過因為實在傷久矣，我已經袂記得戲園內底是生做啥物款？嘛袂記得彼當陣台仔頂搬的是啥物戲齣？
