季芸

青春五四三(一) / 季芸

頭一擺食西餐是佇咧高一的時陣。會記得彼當陣新生一開學，因為導仔(班導)請產假，導仔是教官，所以來代理的是臺南女中的一位葉教官。葉教官嘛是女教官，雖然生做有淡薄仔細粒子，毋過個性誠豪爽，講話嘛真心適，到今我猶閣會記得開學彼工葉教官的自我介紹，葉教官講in兜蹛佇「葉厝村」，「葉」來「葉」厝的「葉厝村」，葉教官刁意故的臺灣國語腔口，予我真深的印象。

雖然是代理導仔，上的又閣是軍訓這種嚴肅又閣無聊的課程，不而過因為個性真好鬥陣上課閣趣味，佮同學之間會使講袂輸朋友仝款，所以班上的同學攏真佮意葉教官。

無偌久，原來的導仔也就是朱教官產假結束轉來矣，這个時陣當然葉教官嘛愛轉去臺南女中矣，同學逐家雖然攏真毋甘，毋過這嘛是無法度的代誌。其實朱教官人嘛真好，只是因為逐家已經慣勢葉教官矣，短短時間閣愛重適應需要一點仔時間。

看逐家有淡薄仔礙虐，為著欲佮同學搏感情，落尾導仔就想一个理由，一方面迎新，另外一方面，因為阮讀的國際貿易，導仔講學習一寡基本的國際禮儀對阮有好無bái，就按呢，導仔決定欲請全班去西餐廳吃一頓好料的。

餐廳就訂佇中山公園，也就是這馬的臺南公園邊仔的一間西餐廳，店名叫「五克拉」。頭一擺食西餐，庄跤倯的我感覺真新鮮，其中一開始送來的「前菜」予我感覺真袂慣勢，外國人嘛咧真奇怪，也毋是兔仔，也毋是羊仔，規盤菜攏無煮過，按呢是欲按怎食？

真無簡單綴同學共一盤「生」菜食完，紲落來就是主菜矣。庄跤人通常無食牛肉，所以我點的是豬排，最後的飲料是咖啡佮紅茶，毋捌啉過咖啡的我雖然真想欲試看覓，毋過聽講啉咖啡會睏袂去，所以落尾我就點紅茶爾爾。

三十幾年前的往事，雄雄想起是因為前兩工聽查某囝咧佮in老爸開講，講臺南的「貴族世家」已經收甲賰兩間，應該是疫情的關係吧？聽著遮，除了感慨疫情造成的影響，嘛予我雄雄想著少年時這段青春的往事，論真講，高商算是我所有學習階段上好耍嘛上懷念的一段，可惜，同學攏無聯絡矣，可能是阮兜的電話有改過，同學就算欲揣我，應該嘛聯絡袂著啦。