close
春風 / 季芸
(台客詩刊第十八期)
春風是一个少年兄
每工認真巡田岸
伊上愛那作穡那唸歌
將汗水當做吉他來彈
天氣愈來愈熱
秧仔秧仔你就快快大
等你大漢 就會換新衫
春風是一台車
載著幸福落海上山
冰冷的霜雪已經軟跤
百花梳妝來對看
鳥仔歡喜來唱歌
蝴蝶伴舞袂孤單
白雲溫純是恬恬仔聽
溪水歹勢細細聲
海水面子上大 噗仔聲催甲上大聲
春風是一塊老曲盤
唱著阿母少女的心情
陪伊行過青春的山嶺
懷念的音樂聲
走過阮細漢時彼片鬧熱的門口埕
軁過歲月的褲跤
佇阮的心肝頭 繼續唱繼續彈
註：
每工：每天
作穡：農活
對看：相親
恬恬：安靜
歹勢：害羞
噗仔聲：掌聲
曲盤：唱片
軁：鑽
全站熱搜
留言列表
