close
雲尪搬大戲 / 季芸
(台客詩刊二十三期)
透早日頭戲門開
雲尪梳妝點胭脂
鳳凰花,粉是抹甲紅記記
恬恬坐佇運河邊,等看戲
白翎鷥踅來閣踅去
雲尪搬大戲
定著是愛揣一个好位,看戲
毋才會四序閣媠氣
咻……
戲棚跤無收錢
無代無誌雄雄煞走來一隻飛行機
目睭皮褫無開,差一點仔
就共雲媠媠的妝舞甲害害去
炎熱的天氣
魚仔探頭吐大氣
看雲媠甲若仙女
毋知影,今仔日的戲文是啥物?
周公大戰桃花女
紲落來,是姜太公釣魚…
風,偷偷來通知
魚仔驚一下,緊
踮沫
註:
雲尪:大片雲朵。
定著:一定
揣:找
四序:舒適
褫:張開、展開
共:把、將
舞甲害害去:弄壞、毀壞
啥物:什麼
紲落來:接下來
踮沫:潛水
全站熱搜
留言列表