季芸

自認狗聲乞食喉，所以自細漢我就毋敢唱歌，除非是音樂課，無唱袂煞得，若無欲叫我佇眾人面頭前開喙唱歌，可能愛等天落紅雨日頭對西爿出來。

講著音樂課，國校仔的時陣，逐擺若是搪著欲考唱歌我就掣咧等，足驚五音不全去予同學笑甲反過。彼咧時陣，考唱歌愛徛佇老師的邊仔，老師那彈琴，輪著考試的同學就綴咧那唱。因為緊張，考唱歌的時陣我攏毋敢唱傷大聲，目睭嘛毋敢看下面的同學，一个心肝頭咇噗彩，手心流凊汗，一條歌唱煞已經軟跤。

高中的時陣，社團活動定定愛唱歌，佳哉是一陣人做伙唱，所以我就較毋驚，細細聲仔放輕鬆綴逐家做伙唱，橫直唱無好嘛無人知影。

出社會了後，三不五時朋友相招去KTV，大部份我攏是坐佇遐負責拍噗仔，恬恬仔欣賞朋友的歌聲，mai51 ku11是連摸攏毋敢去摸。有當時仔朋友看我攏無唱會鼓勵我唱一條，面皮薄驚歹勢的我，猶原選擇做一个忠實的聽眾較妥當。

毋知對當時開始，毋敢唱歌的我雄雄煞變甲真愛唱歌，甚至家己寫歌。其實會當唱家己寫的歌嘛是一種誠幸福的代誌。袂曉樂器嘛毋捌樂理的我，一開始只是改編一寡現有的歌，後來因為愛寫，愈寫愈濟，干焦有詞無曲無法度唱，落尾我才沓沓仔試看覓共家己寫的詞唱出曲調。雖然講毋是專業，毋過捷寫捷唱，久矣嘛變做一種特別的趣味。

寫歌唱歌幾若年，這馬，雖然歌聲猶原無啥物進步，毋過就親像煮食摻鹽佮味素粉仝款，唱歌已經變做日常，是生活中的調味，好聽無好聽無要緊，重要的是歡喜就好啦。