季芸

臺語 / 季芸

臺語，是阮的囡仔伴
對細漢到這馬
已經熟似幾十冬矣

較早
因為無了解，臺語予人看無目地
講伊倯，閣水準低
甚至
規定佇學校的時陣，袂使佮伊做伙

袂輸虱目魚跳過岸
幾十年經過
這馬時勢已經無仝矣
愈來愈濟人佮意佮臺語交陪
甚至
嘛將臺語編入課本寫入冊

其實臺語的聲真好聽
七個聲調親像咧唱歌
歌聲美麗感情滿，真濟人愛聽
「愛拚才會贏」街頭衝甲巷尾
鼓勵人做人愛拍拚
「落雨聲」真出名
唱盡序細的遺憾佮對阿母思念的心情
「山頂的黑狗兄」
毋知迷倒偌濟少女的心肝

臺語嘛是一个文學家
智慧好閣學問飽
俗語唸來，趣味閣袂喙焦
就連罵人的話
有時陣嘛親像藝術家咧作畫
有人受氣一腹火，有人感覺真笑詼
當局者迷

臺語樸實閣親切
雖然過去因為無衫無法度佮人盤撋
這馬新衫做好袂閣花嗄嗄(sà)
若欲交陪免歹勢
無屠羊，無刣雞
一杯茶，等你來坐

註：

對：從、自
這馬：現在
熟似：認識
看無目地：瞧不起
倯：低俗
袂使：不行
無仝矣：不同了
佮意：喜歡
濟：多
序細：晚輩
偌濟：多少
喙焦：口渴
受氣：生氣
一腹火：一把火
笑詼：：好笑
盤撋：交際
花嗄嗄(sà)：混淆不清