阿母一百分 / 季芸
(台客詩刊第十八期)
當掉青春
換來滿面的皺痕
規年迵天無歇睏
為囝 為孫
性情溫馴
卻毋願向命運落軟
有苦腹內吞
將疼 咬佇喙脣
病疼無注文
雄雄一枝紅軍
袂輸六月天落霜
堅強 是上好的藥方
做人守本份
是非 無佮人議論
雖然毋捌地理佮天文
勤儉扞家知分寸
挽面收驚是半天份
人教一擺就毋免閣再問
無趁分文
服務親情佮囝孫
心媠免抹粉
行得正就毋驚犯人問
做人就愛認份
甘願擔塗嘛較贏去共人分
毋免驚烏雲
雲開天就自然清
暗暝閣較長
天若光 日頭仝款上山崙
人生遺憾有時陣
雖然阿母已經離開阮
心肝頭猶原會記得阿母的教訓
佇阮的心內 阿母永遠攏是一百分
當掉：典當
皺痕：皺紋
喙脣：嘴唇
毋捌：不懂
扞家：持家
趁：賺
親情：親戚
媠：漂亮
分：乞討
全站熱搜
留言列表
