季芸

冷宮寒冷無人知
拍開窗門見月眉
臺語其實真可愛
身為臺灣人哪會使毋知…

記持 / 季芸

車內，我予大人抱咧，毋知影是拄上車？抑是，拄好欲落車？干焦差不多一、兩秒鐘的畫面，霧霧無蓋清楚，袂輸是夢中的一个情景，閣敢若親像是……一張真久真久進前的烏白相片，彼，是我人生上早的一个記持。

「你是佇臺北出世的，佇你五歲的時陣，咱才閣搬轉來臺南的……」。沓沓仔較大漢了後，聽阿母講我才知影，原來，佇彼个草地所在歹趁食的年代，為著生活，阿爸捌𤆬(tshuā)阮規家伙仔去臺北拍拚。佮真濟人仝款，阿爸嘛去踏三輪車，後來改駛計程車，落尾因為一寡原因才閣搬轉來祖厝。車內彼个雺霧的記持，凡勢就是蹛佇臺北的時陣來來去去，或者是拄搬轉來落車的時陣，所留落來的淡薄仔印象？

五歲進前的代誌，我會使講完全無印象，佇臺北生活彼幾年的沓沓滴滴，攏是聽阿母佮阿姊in講起我才知影的，臺北這个我佇遮出世、佇遮學行、學講話，大人喙內的繁華都市，對我來講，不過是一个生份的所在，自我有記持以來，我就是一个逐工佮塗耍做伙的庄跤囡仔。