close
西北雨 / 季芸
日頭走便所
臨時臨曜，共天
暫時交予雲來看顧
雲，一个面仔臭kōnn-kōnn
「遮爾大的天，是欲按怎顧？」
雷公摃鑼拍鼓
趁日頭無佇咧，緊
招爍爁出來𨑨迌
金光閃閃比手畫刀
小等一下轉去，千萬
毋通袂記得等路
驚曝烏的雨是歡喜甲嚓嚓趒
清風攬腰跳曼波
幸福拍箍，圍滿
愛的小路
路螺揹厝四界賴賴趖
天氣熱甲咻咻叫
想欲啉一杯茶，哪知影
煞揣無茶鈷
白翎鷥上好笑
無代無誌舞甲一身軀澹糊糊
欲換，煞揣無衫褲
只好共沃澹的心情袚佇竹篙
等，日頭出來主持公道
註：
走便所：跑廁所
共：把、將
爍爁：閃電
等路：禮物
拍箍：打圈
袚：披、掛
全站熱搜
留言列表
